Redes AFE
Jarri gurekin harremanetan

Zer da?

Familia harrera espezializatua kanpoko familia batean egiten den harrera mota bat da. Eta familia horretako kide batek, gutxienez, haur eta nerabeei, administrazioaren tutoretzapean edo zaintzapean daudenei eta premia edo inguruabar bereziak dituztenei dagokienez funtzio hori betetzeko kualifikazioa, esperientzia eta prestakuntza espezifikoa izango du.

Familia harrera behar duten neska-mutil gehienak familia boluntarioek har ditzakete, baina beste neska-mutil batzuek bestelako harrera mota bat behar dute, eta horientzat harrera espezializatua planteatzen da.

Neska-mutil horiek askotariko egoerak izaten dituzte, eta zaila da haientzat borondatezko harrera familia bat aurkitzea:

Honako hauentzat da egokia:

  • Desgaitasun aitortua duten adingabeak.
  • Osasun arazo bereziak edo arriskuak dituzten adingabeak.
  • Portaera edo egokitze arazoak dituzten adingabeak, eta, horrenbestez, familian eta gizartean integratzeko zailtasunak dituztenak.
  • Bestelako premia bereziak dituzten adingabeak.

Zergatik prestaketa bereziko familia harrera espezializatua?

Kalte emozionalak arintzen eta aurretik izandako historiako zailtasunak lantzen laguntzen duen familia ingurunean bizitzea ahalbidetzen die. Betiere, haurren zein nerabeen instituzionalizazioa saihestuz edo mugatuz.

Harrera familiaren laguntza espezializatuaren, familia horretan onartu eta txertatzearen eta egiten den esku hartze egituratuaren bidez, posible da laguntza giroa garatzea eta haurrek edo nerabeek dituzten zailtasunei irtenbidea bilatzea.

Familia harrera espezializatuak honako hauetan laguntzen die:

  • Kalte horietako asko konpontzea
  • Beste familia batean lotura positiboak sortzea
  • Jatorrizko familiarekin harremana izatea

Ez da adopzio bat, ezta horretara bideratutako pauso bat ere. Ez du jatorrizko familia ordezkatzea bilatzen; are gehiago, une oro errespetatu eta kontuan hartzen du.

Arazo sakon bat konpontzeko, denbora eta ahalegina behar dira, baita pertsona askok norabide berean arraun egitea ere.

Legez ezarritako familia harrera modalitateetatik honako hauek lehenesten dira:

• Aldi Baterako Harrera: bi urte inguruko iraupenarekin, jatorrizko familiarekin itzultzeko aukera handia dagoen egoeretarako.

• Harrera Iraunkorra: itzulera pronostiko argirik ez dagoen baina haurrak bere jatorrizko familiarekin duen lotura emozionala mantendu behar den egoerei zuzenduta dago. Iraupena mugagabea da.